हैन... किन अन्त्य हुंदैन हाम्रो समाजमा पुराना कुसंस्कारहरु ? अझै पनि यसो गर्‍यो, उसो गर्‍यो कुसंस्कारका शिकार नारीनै बन्नु परेको छ । भन्न त भनेका छन नारी सृष्टीकर्ता हुन, नारी देवी अनि लक्ष्मी पनि हुन । तर नारी अरु केहि हैन आमा हुन भनेर बुझ्ने मान्छेलाई नारी को हुन ? भन्नेर धेरै बखान गर्न जरुरी पर्ला जस्तो लाग्दैन ।

भोगदै आईरहेको साँचो कुरा ओकलने नै हो भने २१ औं सताब्दीमा पनि जिउदो पुरुषको खुसीमा निउदो नारी जिउदै सती जाने पर्थाले बिकराल रुप लिईसकेको छ । अब पनि नारी नजाक्ने हो भने, आदिमकालको सती जाने पर्था भन्दा अझ भयाबह नहोला भन्न सकिन्न । खासगरी नेपाली समाजका अधिकांश नारीहरु कुवाको भ्यागुटा झै गृहस्थी जीवन बिताउन बाध्य छन । त्यहि समाजका केहि सचेत नारीहरु समाजको लागि हामी पनि केहि गर्नु पर्छ भन्ने भावनाले बोल्यो भने "बोल्यो कि पोल्यो" भन्या झै कौनाको गृहस्थी जीवनबाट पनि हात धुनु परेको उधाहरणहरु धेरै छन ।

नेपालको भु-भागकै आधारमा भन्नु पर्दा आधा भन्दा धेरै भाग नारीले ओगटेको छ । तर हरेक क्षेत्रमा नारी सहभागीता र सक्रियतामा कम हुनु र नारी ओझेल पर्नको मुख्य कारण के हो ? किन सिंगो समाज मौन छ ? तिनै आमाको दश महिना कोखीमा बसेर जन्मेका र दशधारा दुध चुसेर हुर्केका महापुरुषहरु कहाँ गए ? कहिले सम्म तमसा हेरेर बस्ने ? घैटाँमा घाम कहिले लाग्ने ? किन यस तर्फ़ कसैको ध्यान जान सकेको छैन ? अब पनि सबै निदाउने हो भने निकै सोचनिय बिषय बन्दै गईरहेको छ ।